जन्तुको राज मान्छेको देशमा

शिव प्रकाश

बबुरो बाघको जिम्मा
गोठको पहरा
सुदो स्याल गोठालो
रुङ्छ हाँस-कुखुरा
बाबै बुढो लाटोकोसेरो
पावरदारी चेस्मा
दिनभर चहार्छ
सरकारी भेषमा
हामी लाटा-काना
जनताको देशमा ।
परेवाको खोरमा
गुनी गिद्धको बास
शान्तिको सन्देश
चाटू चिलको हात
राजनीति गर्ने
इमानी कागको झुण्ड
शान्ति-सुरक्षामा
सत्य शुण्ड र मुण्ड ।
आँखा चिम्लेका
उसै तर इश्वर
न्याय दिने
असल असुर-बेसुर
उसमाथि आँखामा
इश्वरको अर्को पट्टी
न्यायको तराजु
ढल्किन्छ सधैं उल्टापटि्ट ।
जनताको दुःख
गोहीको आँसु
नेता रुदै चपाउँदै
देशको हाडमासु
ब्वाँसाको चलखेल
मान्छेको भेषमा
जन्तुको राज
मान्छेको देशमा ।

बोस्टन, अमेरिका ।