यो त्यही गाउँ हो

स्यानु पाईजा

टप टप झरेर बलेसी
बाल्टिन मा संगालिदैछ
बिजुली गर्जेको बेला
झयार् झयार् रेडियो बज्दैछ
टुकीमा उज्यालो बन्द कोठा
बिपनामै देखेका मिठा सपना
यो कल्पना नै हुन्दो हो
सुनसान यो रातमा
नयन कहि रसाउँदो हो
यो त्यही गाउँ हो
कटुबाल औरास्थ्यो रे
कुनै बेला ठुल्ढुंगाको डिलमा
मुखियाको आँगनमा सेर्मा तिर्नु जाऊ
पात्लेफाँतमा दाईहान्नु आऊ
सुनेन भन्न पाईने छैन
समायका चर्खामा सर्काईएका
अल्लोका धागो हरु
गलबन्दी बन्न सकेका छैनन्
बनेका गलवन्दी पनि गलामा छैनन
उ मुग्लान बाट फर्केको छैन
यो गाउँले धेरै भोगेको छ
कहिले लगान, कहिले सेर्मा,झारा
कहिले तिरो नाम बदलेर तिरेको छ
हिजोका मुखियाका नाती
दश बर्ष प्रधानपञ्च भएर
कति हो बर्ष अध्यक्ष भएको छ।
बुढो कटुबाल सास नपुगी नपुगी
उहि ढुँगामा कर्नाल फुक्न खोज्छ
प्रधानपञ्चको आगन कण्ठ पारेको जिब्रो
अध्यक्ष भन्नु आएको छैन
कर्नाल फुक्न सकेको छैन
साहेद मर्नु अधि उस्को जागिर खोसिन्छ
हिजोका केटा आज नेता
पस्यो शहर भिरेर फेटा
रगतमा औला चोबेर खाएका कसम
हामीले कसम टोडेका थिएनौ
तिमीलाई मान्य बनाको गाउँ यै हो
तिमी मात्र फेरियौ हामीलाई फेरेनौ
सांम्सद,सभासद .....सद बनि सक्यौ
तर यो गाउँ उस्तै छ।
बाजेको पेन्शन कुरेर बसेकी बजै
सिलाङमा लापत्ता भएको छोरा
देशको लागी लड्न निस्केको नाती
तिन थरि याद बोकेर के सोच्छिन होला ?
माईक मा कोहि औरास्दै छ
......नढले सम्म आन्दोलन गरौ
यसपाली त शहरमै पुग्नु पर्ने रे
हुलका हुल नेताहरु
बरिपरि दुना टपरिहरु
बज्यै लाई भन्दै थिए
सिलांङ पुगेरै छोरा ल्याइदिन्छौ
नातीलाई नेता बनाई दिन्छौ
थाहा छैन बज्यै कान सुन्दिनन
थाहा छ नाती मारिई सकेको छ
आँखा नदेख्ने, कान नसुन्ने
बजै को भोट चाहिएको छ
फेरी .......सद बन्नु छ
आखाँ देख्नेहरुले धोका दिन्छन
यो त्यही गाउँ हो
कटुबाल औरास्थ्यो रे
कुनै बेला ठुल्ढुंगाको डिलमा
नयाँ कटुबाल खोजिदै छरे
कर्नाल फुक्न सक्ने ।
औरासेर सन्देश छर्न सक्ने

नोट-

कटुबाल- चर्को स्वरले सबैले सुन्ने गरी सामुहिक सन्देश सुनाउने मान्छे

औरास्ने- चर्को स्बरमा सबैले सुन्ने गरी सामुहिक सन्देश सुनाउने काम
कर्नाल- सन्देश सुनाउनु अधि ध्यान तान्न बजाउने बाजा ( नगरा )

पात्लेखेत-७, म्याग्दी